Ky event zhvillohet me rastin e 30-vjetorit të anëtarësimit të Austrisë, Finlandës dhe Suedisë në Bashkimin Evropian. Ai fokusohet te një panel diskutimi me Andreas Schieder dhe Arba Kokalari, që do të trajtojë udhëtimin 30-vjeçar të Austrisë, përvojën e integrimit, rolin në politikat e Bashkimit Evropian dhe mësimet për të ardhmen e vendeve anëtare.

Clara Montocchio Quintet sjellin një koncert unik ndërzhanror, duke kombinuar muzikën e përjetshme të Johann Strauss-it me elemente xhazi, pop dhe chanson-i. Programi rikompozon kryeveprat e gjeniut austriak, duke krijuar një përvojë dinamike muzikore që kapërcen kufijtë e zhanreve dhe sjell shpirtin e Strauss-it në shekullin XXI.

Theresia Töglhofer po qëndron në rezidencën letrare “POETEKA – Tirana In Between”, si fituese e bursës për autorë dhe përkthyes letrarë. E specializuar në politikën e jashtme dhe zgjerimin e BE-së, ajo është autore e romanit “Tatendrang” dhe fituese e disa çmimeve letrare. Ajo do të punojë mbi krijimtarinë e saj të re dhe do të marrë pjesë në lexime dhe veprimtari publike.

No Borders Orchestra (NBO), një ansambël i përbërë nga muzikantë profesionistë nga rajoni i ish-Jugosllavisë, do të performojë për herë të parë në Tiranë me koncertin “Turning Point”, në kuadër të natës përmbyllëse të Javës Kulturore Austriake, organizuar nga Ministria e Turizmit, Kulturës dhe Sportit dhe Ambasada Austriake në Tiranë.I njohur për bashkëpunimin me Universal Music dhe Deutsche Grammophon, NBO sjell një projekt që shkon përtej muzikës – një thirrje për reflektim dhe veprim përballë sfidave globale si luftërat, pabarazitë, ndryshimet klimatike dhe shkatërrimi i natyrës.