Një shfaqje kukullash pa fjalë nga Dikla Katz dhe Avi Zlicha, e vlerësuar me 16 çmime ndërkombëtare dhe e shfaqur në më shumë se 30 vende të botës, sjell në skenë një histori universale për njerëzimin, natyrën dhe lakminë. Përmes librave të vjetër, kopertinave të ricikluara dhe faqeve të zverdhura, rrëfehet një tregim prekës për një djalë dhe një pemë – një udhëtim nga fëmijëria në adoleshencë, nga fushat e gjelbra drejt betonit gri, me një syth të vetëm shprese si simbol rikthimi dhe reflektimi. Frymëzuar nga “Pema Dhuruese” e Shel Silverstein, shfaqja përçon mesazhe të thella pa asnjë fjalë, duke komunikuar përmes emocioneve dhe artit të lëvizjes. Pas shfaqjes, publiku do të ketë mundësinë të marrë pjesë në një workshop me artistë të Teatrit të Kukullave.